ساتیرا- طنز

"یــر یــۆزۆنینگ تـۆرکمنلری پـیتراشینگ"

ســــاتـــیــرا

باش رول لاردا

آماندوردی- آنناگلدی: تـۆرکمنصأحرادان

چاری- بأشیم: تـۆرکمنیستاندان باران میحمانلار

صاحنا: کـۆممت غاویز. آنناگلدی لرینگ اؤیۆنده
*********************

آنناگلدی: دوستلار حوش گلدینگیز. "میحمان آتانگدان قوچاق" دییپدیرلر، آلینگ، ایینگ- ایچینگ

میحمانلار: ساغبولینگ، ادن حـِززت- سیلاغلارینگیزا میننتدار

آمانگلدی: تورکمن تلویزیونینی توماشا ادیپ-أ سیزینگ یوردینگیزدان حابار ادینیپ بولانوق، شول بیر سیحیللی "حورمـــاتــــــلی پره زندنتیمیز"... شونی غایتالاماقدان باشغا زات بیلمه یأن یالی لار. حانی، آیدینگ آتا واطان دییلیأن تورکمنیستاندا نأحیلی اۆیتگـِشیکلر بار؟

چاری: آی، نأم بولسون. بیزم بی حابار بنده لر، یورتدا نأم بولوپ گچیأندیگینی حابار بریش سریشده لر آیتماسالار، نیردن بیلجک یوردونگ دۆرلی ولایاتلاریندا نأم بولوپ گچیأنینی!

بأشیم: مونی گؤر، ولایتلار-آ دورسون، حوت شو یاشایان پایتاغتیمیز آشغاباتدا نأم بولوپ گچیأندیگینی بیلمزوق. دینگه آلدیغیندان بلند- بلند جایلارا کؤمــِلک یالی بولوپ-آ یردن چیقیار.

آنناگلدی: یوغسا- دا قولایدا دۆنیأ تورکمنلرینگ ماصلاحاتی بولوپ گچدی، اوندا پره زیدنت تـۆرکمنلری بیرلشیگه چاغیردی. بو قاوی حابار بولمالی. عاصیرلار بأری آغزی آلالیقدان اجر چکیپ گلیأن حالقا اولی چاغیریش بولسا گرک.

چاری: "قـوری گپدن پالاو بولماز" دییپدیرلر. اگر اولار دوغرودانام حالقینگ جبیسلِشمگینی ایسله یأن بولسالار، بو اوغوردا چینلاقای أدیم أدردیلر. همه سی بوش گپ، اؤزۆنی ماحاباتلاندیرماق اوچین غورنالیان اویونلار اولار.

آماندوردی: دوغری آیدیانگ. اینگ بأرکیسی دوغان- غارینداشی گؤرمأگه تورکمنیستانا گیتمک اوچین سیغرینگ دیلی یالی ویزا کاغاذینی برجک بولسالار امــِن سۆیدۆنگی بورنینگدان گتیریأرلر. اونسونگ اینها، ایکی اؤیلی غازاق دییپ، غازاغیستان غونگشی گـۆرگن شأحرینده کنسول حاناسینی آچدی، آلماتی-گـۆرگن آرالیغیندا گؤنی اوچار غاتنایار. بیز بولسا ویزا دییپ باریپ ۷۰۰ کیلومتر یول سؤکۆپ ماشادا یا-دا شونچا یول آزارینی گؤرۆپ تأحرانا گیتملی. بای پارس سؤودیگأرلرینه بولسا بیر ییللیق ویزا بریأرلر، غارامایاق تورکمنلر بولسا آراچأکدن ایزینا قاویلیار. پره زیدنتینگ آغزی بیرلیگه چاغیرماغی بیر بوش گپ بولوپ غالیار.

بأشیم: "باغتی یاتانینگ آغزی آشا یـِتنده بورنی غانار" دییلـِـنی. بیز-م ایل دنگینده غاراشسیزلیغیمیزی جار اتسک- ده ۲۰ ییل چمه سی-أ تورکمنباشی دیین بلا ایله- گـۆنه موساللاط بولدی، ایندی- م بو... ادیل "اولی اشـِکدن کیچی اشــیگینگ پوخ اییمأنی اؤورِنر" دییلنی. نیرأ بارسانگ اؤز صوراتینی آسدیریپ، بولماجاسی بولوپ یؤر. آی بولیا- دا... یانیپ اوتورمایین- دا. حانی آماندوری، سیز آیدینگ، سیزینگ تورکمنلر نـِنـِنگسی؟

آماندوردی: بیز- ده اؤورلیک یاغدای یوق. شو گؤرِنینگ تورکمندیر- دا. "ایلاییم آغزینگیز بیریکمـِسین" دیین یالی غارغیش سینگیپمی، نأممی، اۆچ بولوپ بیر یره ییغناشیپ بولانوق. هرسی اؤزۆنینگکینی دوغری ادیپ گؤرکزمأگه سینانشیار. یوغسام آتالاریمیز آغزی بیرلیک حاقیندا نه دانا سؤزلر آیدیپ گچیپدیر آخرین.

چاری: شو تورکمندأکی "من" سؤزۆنی آییرمالی میقا دییأرین. ماغتیموغولی شاهیرام آغزی آلالیقدان یانیپ، کؤیۆپ گچیپدیر. "منلیک اتمه ملال بار" دییپدیر. تاریخه بیر سرادینگ باریپ بییک سلجوقلی دؤولت دارغاندان بأری تورکمنلر آغزی بیر بولوپ بیلمأن گلیپدیرلر. یوغسام ۱۶-نجی عاصیردا اؤزبکلر بیرلشیپ شیبانی دؤولتینی عمله گتیردیلر، تأجیکلر بوخارا امیرلیگی آستیندا اؤز دؤولتینی اساسلاندیردیلار. اما تورکمنلر آغزی بیر بولوپ، آبانیپ گلن دوشمانلارینگ اؤنگۆنده دوروپ بیلمأن "داش دۆشن یرینه دگسین" دییپ حرسی اؤز ایشی بیلن بولوپدیر، شـِیدیپ حم بیر طاراپدان حیوا حانی، بیر طاراپدان بوخارا امیری، ایلردن ایران، حازاردان بولسا روس قشونی حالقیمیزی پایحینلاماق پایحینلاپدیرلار. یوغسام باشیمیزینگ تأجی بولان ماغتیمغولی "یوموت گؤگلنگ، تکه یازیر، آلیلی بیر دؤولته قوللوق اتسک بأشیمیز" دییپ آرزولاماق آرزولاپدیر. حانی قولاق آسان؟ حانی حالقینگ باشینی بیریکدیرمأگه سینانشان حالال سۆیت امن حان. نوربردی حان یکه باشینا غالدی، اونام پارسمی روس ایچالی لاری آوی بریپ اؤلدۆردیلر. غاوشیت حانی- دا آلدیلار.

آنناگلدی: دوغری آیدیانگ. بیزینگ باشیمیزا- دا شـِیله حوپبات اینیپدیر. ۱۹۲۴- نجی ییلدا جمهوریت غورماغا حالق آیاغا غالیار. عثمان آخونی باش ادیپ بلله یأرلر، اما اونونگ غارشیسینا رجب آخونی چیقاریارلار. واخ، شول واقت أهلی حالق بیر تن بیر جان بولوپ دوران بولسالار، بلکی بو گونکی آغیر یاغدایلار باشیمیزا گلمزدی. اونسونگ "توده" دیدیمی، "فـدایی لار" دیدمی دۆرلی پارس توپارلانشیغی حالقیمیزینگ اینگ چوربا چیقانجالارینی آلداپ، اؤز طاراپینا چکیپ، یوق بولپ گیتمکلرینه سبأپ بولدولار. اینگ بارکیسی شو گونلر یورتدا حاچان- دا سایلاو گچیریلمأگه باشلاناندا تورکمنلرینگ اؤنگده باریجیلاری نینگ حرسی، بیر کاندیدادینگ طاراپینی توتوپ، بیر- بیرلری بیلن یاغی بولپ، "جان گرکمی- پیچاق" بولیارلار. یوغسام حاقلارینی غوراپ بیلجک بیر تـۆرکمینگ داشینا اۆیشسه لر نأدرسینگ حاق سورالسا.

بأشیم: یوغسا- دا سیزده اینترنت قاوی ایشله یأر، داشاری یورتدأکی گؤرشجنگ تـۆرکمنلردن نأمه حابار؟ اولار ایرانداقی یاغدایه تأثیر ادیپ بیلمه یأرلرمی؟

آماندوردی: (قاه- قاه گۆلیأر) اولار اؤزلرینی اونگارسالار بولدوغی، بیزه اولارینگ آزاری- دا بیزاری- دا گرک دأل. آحاوو بأشیم جان! بیلانوقمی تــــــــۆرکــــــمـــــن، حاوا تـۆرکمن. حیی- دا بیریگرلرمی؟ بیریگسـِلر تأثیر یتیریپ بیلرلر-دا. دۆین پارسلارینگ فـداییلاری بارقا حرسی یوقاری درجه طماع ادیپ، یوقارراق وظیفه ایه لجک بولوپ، اولارینگ غویروغیندان برک یاپیشیپدیلار، گیجه- گـۆندیز دییمأن ییغناقلارینا غاتناشیاردیلار، "آغزی بیرجه" حرکت اتدیلر. حاچان- دا فدایی لارینگ آت-آوازاسی یاتیشیپ باشلاندا تورکمنلرینگ بیر توپاری اؤزباشداق حرکت اتمأگه سینانشاندا دۆرلی یردن شیلتاقلار باشلاندی. اینگ بأرکیسی شو توماچ پاخیرینگ غوروپ گیدن "کانونی" ساقلاپ بیلمأن، بؤلک- پۆچـِک اتدیلر. نأمه میشین هرکیم باش بولجاق میشین. ادیل سیزدأکی تورکمنباشی یالی.

چاری: اشدیشیمیزه گؤرأ اول تـۆرکمنلر چپچی بولمالی. اولارینگ سرداری لنین "یر یـۆزۆنینگ ایشچیلری بیرلشینگ!" دیین شیغاری باش ادیپ گؤتریپدیر. حیی، اولار موندان اوغور آلمایارمیقا؟

آنناگلدی: بیزینگکیلر اول شیغاری "یر یـۆزۆنینگ تورکمنلری پیتراشینگ!" گؤرنۆشینه اؤورنه منگزه یأر.

اوتورانلار قاه- قاه گۆلۆپ، آنناقاقادان آلان الده یاسالان عاراقدان دولی بولغورلارینی بیر- بیری نینگ ساغلیغینا گؤتریأرلر
آقمیرات گورگنلی