جادیلانان ملت- ارته کی

جـــاديـلانــان ملت

بيرى بار ايدى، بيرى يوق ايدى، قاديم اييأملرده تانگریدان باشغا ماوى آسمانينگ آستيندا، جـنتـته منگزش توركمن ايلينده عاديل بير سلطان بار ايدى. اونونگ اركين ديين بير اوغلى بار ايدى. بو اوغلان باتير هم پأليوان بير ييگيت بولوپ يـتيشیأر. گپلأنده ايل آغزينگا آنگق بولاردى، يؤرأنده دابانيندان اوت چيقاردى، ناغـرا دارتاندا داغلار تيترأردى. آرســلان يوره كلى اركين، آغزىبير ايلاتينگ ساياسيندا دوشمانلارينا گون برمأن، اييـنلرينى آوى، گه ينلرينى ماوى، گونديزلرينى گيجه ادردى.

گونلردن بير گون، ظاليم طايپانینگ آق ساقغاللارى، ملا- مفـتى لرى بير يره اۆيشۆپ، اركينينگ مأحنـتيندن دينماق اوچين كل كله¬لرينى غاشاشيپ، ساقغاللارينى يولارا گتيريپ، آغير اويا باتيپ، دوزاق قوراماغينگ يوللارينى آغتاريپ باشلايارلار. ماصلاحاتا اويشنلرينگ آراسيندا پارسخان- دا باردى. اونونگ سويجى ديللى گؤركانا غيزى باردى. آخرى بيريسى: "پارس حان! سن غيزينگـى اركينه برجك دييپ اونى غالا چاغير، شو يرده هم اونونگ باشينى كس، شئيله اتمِسک باشغا چأره يوق" دييدى. بو ماصلاحاتى همه لر ماخوللاديلار.

پارس حانينگ نأچه يئلدان بأرى أره باريپ بيلمأن، باريپ ياتان گلشيكسيز، ديشلرى چۆيرأن، ساچلارى دۆشن «شوون» ديين بير غاررى غيزى بار ايدى، اينه شول غيزى اركينه برمگـى نيت اديأرلر.

ارته سى پارس حان دؤرت يانا چارپار گؤنده ريپ، غالاما- غالا سؤكدوريپ: "پارس حانينگ آوادان هم گؤزل بير غيزى بار، اول كيمى حالاسا، حان غيزينى شونگا برجك، هم-ده اونى اؤز ميراث دۆشرى، يرينه پادشاه اتجك" دييپ جار چكديريپ، آلا- قالماغال توروزيار. شوون ينگ بولسا چۆيريك ديشلرينى تايى گؤرولمديك هينجى صادافلار بيلن بجرديپ، ساچلارينى آتينگ غويروغى نينگ غيللارى بيلن اؤريپ بزه يأرلر، آدينى هم شوو دان « فارسيا» اويتگديأرلر.

گونلرده بير گون ايديپ- بئيديپ، اركين بگـى، پارس حانينگ غالاسينا گتيريأرلر، آياغى نينگ آستينا اينگ آوادان حالى لارى دۆشه يأرلر. يوماقچى سويتارلار اركينى اؤويپ، "بولار يالى ييگيده قيرق قيز قوربان بولسین" دييپ يانگسيرايارلار. اركين بگ غالادا گؤونى نينگ ايسلأن كه يـپـينى اديپ، اييپ-ايچيپ، ذوق- صاپا سوريأر. اما يانى بيلن اؤز ايليندن گتيرن چؤركدن گۆنده بير دؤوم ايمگـى- ده اونوتمازدى. پارس حانينگ غالاسينا غايتمازدان اؤنگ آتاسى اركينه: «اوغلوم، بو چؤرك سنى پارس حانينگ پـيس نيـتيندن غورار، اول سانگا تۆكنمز هم ينگيلمز گويچ بره ر» ديیـپدى.

ايندى حابارى كيمدن آلايلی، اركين حانينگ ايليندن آلايلى.

اركين باتيرينگ يورتدن چيقيپ گيده نينى اشيدن اورس حان در حال پارس حانا چاپار يوللاپ، اركين بگينگ يوردينى تالاپ ياغمالاماق اوچين آماتلى پورصاتينگ گلنديگينى آيديار. بولارينگ ايكيسى ايكى ياندان اركين بگينگ توپراغينى تالاپ، ايل-اولوسى غيريپ، مال- غارالارینى تالاپ، گلين- قيزلارينگ ساچلاريندان سويرأپ يسير اديپ آليپ غايديارلار و ارکین حانینگ يوردى اؤز آرالاريندا پايلاشيارلار.

ماقصادينا يتن پارس حان، بگنجيندن دونونينا سيغمان، اولى طوى توتوپ، اينگ سونگك دوستلارينى، باشدا اورس حانى طويا چاغيريار. اول، آيرى يورتلاردان باسيپ آلان، طالاپ گتيرن اولجالاردان نؤكرلرينه بول- بول سرپاى بريأر.

اينه، اورس حان، پارس حانينگ تويونا بو واقعانينگ ايز يانى قوشولوپ دورشودى. اولار شراب دولى بولغورلارينى اؤز ينگيشلرى اوچين غالديريارلار. اورس حان، چين دوستى پارس حانينگ تويونا الى بوش گلرمى؟ اول يانينداقى كيچيرأجيك صانديغينگ ايچيندن هنيز بو گونه دنگيچ گؤرولمه ديك عجاييپ بير توغالاق چويشأنى چيقارياردا: "اينه بو- ده مندن «فارسيا» غيزيميزينگ تويونا ساوغات" دييأر. پارس حانينگ گؤزلرى يئلدير- يئلدير اديپ، حاولوغسيراپ چويشأ الينى اوزاداندا، اورس حان چالتليق بيلن اونونگ اليه قاقيپ: "يوق، جان دوست، بو، آيليغانچ هم حاوپلى ياراغدير، گويچلى پارتلايجيدير، اونى نصيب بولسا اركنينگ يوردينا يومورتغا توغلاپ، اونی دولی ير بيلن يگسأن اتجك گونوميزده اوللاناريس" دييپ، برك سارغايار.

بو آرادا پارس حان هم اونونگ آق ساقغاللاريدير ملا- مفتى لرى اركينى اؤلدورملى گؤنى هم اونى نأديپ اؤلدورمه ليديگينى بلله¬يأرلر. اولار اركين بگـى «فارسيا»نينگ كؤشگينه ايبريپ شول يرده هم جللادلارى گيزلأپ غوييارلار.

غيزينگ گؤشگینه گيرن اركينينگ گؤزى، غوللوق اديپ يؤرن غيزلارينگ ايچينده بير غيزا دوشوپ، هوشی باشيندان گيديأر. شار غاراساچلارى بيلينه دۆشن، هينجى ديشلرى یئلدیران، بادام گؤزلرى پارلان، آلما يانگاقلارى غیپ-غیزیل، جنت حۆیریسی. بو غيز ادیل اؤز ايلينگ غيزلارينا منگزه يأردى. اركين بگ، «فارسيا» دأل- ده حيذماتكأر غيزا طاراپ يؤرأبريأر. مگر بو غيز توركمن ايليندن يسير آلنيپ غالا گتيريلن، آيا سن دوغما من دوغدوم، ديين غيزلاردان توركانه آدلى غيزايدى. شو بادا كؤشگينگ ايچينده گيزلنيپ دوران، اللـرى قليچلى جلادلار اركينه توپوليارلار. توركانأنگ شئيله آودانليغيندان هوش باشيندان گيدن اركين، اونونگ بادلى سس بيلن غيغيرشینا اويانيپ، غالانى جلادلارينگ باشلارينا يومروپ، جانلارنى جأهننمه ايبريأر. اركين بيلن توركانه ويرانا اؤوريلن غالانينگ حارابالارىنينگ آراسيندا گزيپ، پارس حانينگ جان چويشه¬سينى تاپيپ، اونى کول اوورام اديأرلر، شول بادا گينگ بير دروزه پئيدا بولیار، اركين ، توركانأنى آليپ غيراتينا مونيپ، اؤز ايلينه اوغرايار.

اركين اۆز ایلی نینگ دروزه سيندن گيرن بادينا، يورتده انچمه اويتگه شيكليگينگ بولانديغينى آنگيار. بير توپار آدمينگ ايركيلشيپ، بير گؤزلرينى يوموپ، بيرسينى زوردان آچيپ، تيترأن سس بيلن گورلشيأنديگينى، آنگيراق باراسا يئنه بير توپارينگ انتك كيچى بير زادينگ اوستونده بير- بيرلرى بيلن ياقلاشيپ دورانديغينى، غاراوللارينگ بولسا گونألينى دأل- ده گونأسيزى توتوپ آليپ گيديأنديگينى گؤريپ، غاتى گنگ قاليار. انچمه يئلاپ ايل غايغيسيندان باشغا غايغيسى بولمان، شونونگ اوچين- م غايغيسيز آدينى آليپ، عاديلليقدا حؤكوم سورن حان آتاسى نينگ يرينه بولسا «پانگ مراد» ديئن بيريسى نینگ كؤشگه، تاغتا چيقاندیغینی گؤریأر.

ارکین آتاسى نينگ يانينا باريپ، نأمانينگ نأمه¬ ديگينى سوراندا، اول:

" اوغلوم، بيريسى پارس حانينگ و اورس حانینگ غالالاريندان بير بؤله جيك يئلديراويق سويشه گتيردى، هر كيم اونى آلجاق بولوپ جان سره ك بولدى، بير- بيرينى اؤلدورمك دييرسينگمى، شوغولچيليق اتمك دييرسينگمى، بى ناميسچيليق دييرسينگمى، غاراض هر حيل اربتليگه باش قوشدولار. اولارى هرنأچه اوزالقيسى يالى آغـزى بيرجه بولوپ ياشاماغا چاغيرسامام، سوزومى دينگلأن بولمادى. آلداواچ هم حيله گأر وزيريم «پانگ مراد» بو ياغدايدان پئيدالانيپ، اؤزينه هـواندار تاپماق اوچين سويشه¬دن ايسلأنه بير قيـيلچاجيق بريپ، آداملارى جاديلاپ باشلادى، شئيديپ- م يوردينگ تأج- تاغتينا ايه بولدى. ايندى حاچان هم نأديپ بو طلسيمى چؤزيپ، جاديلانان حالقى اويانديريپ بولارقا؟" دييپ، گؤزلريندن بويور- بويور باغير ياشين دوكدى.

ياغدايا گؤز يتيرن اركين بگ غارشيداقى بـييك داغينگ اوستونه چيقيپ، شأهره سراديپ، چونگ اويا باتيار. اول اؤز حالقى نينگ شئيله آغير گونه دوچار بولانديغينا غاتى توقات بولوپ، يوره گـى آغزيندان چيقارا گليپ، غم درياسينا غرق بوليار. شو بادا روحى تنيندن اوچوپ، اؤزى بولسا اوللوقان بير داشا اؤوريليأر.

شوندان گونلر، آيلار، يئللار اؤتيأر. كؤچه دن اؤتۆپ باريان ياشولى انه-آتالار پانگ مرادينگ قاراقوللاريندان حواطيرلانيپ، اوغرينچا : «حانها، قايغيسيز آتاميزينگ اوغلى اركين بگ اوتير» دييپ، بالالارينا داغينگ اوستونده دونگوپ دوران أپت داشى گؤركزيأرلر.

اركين، شو يردن گؤزى ياش، باغرى باش ايلينه سر اديپ اوتير، سر اديپ اوتير...

آقمـيـرات گورگنلى