گچمیشینی اونودانینگ گلجگی بولماز- تاریخ

آکادمیک بی بی پألیوانووا

تـۆرکمنیستانینگ تاریخی حاقیندا اویلانمالار

سووت ایمپِریاسی نینگ باقنالیغا اؤورن رسپوبلیکالارینا بولان غارایشی.

(نیکیتا خروشچووینگ تـۆرکمنیستانا ساپاریندان آجی یاتلامالار)

0(کیچیجیک اپـیزود)

تـۆرکمنیستانینگ حالقی تـۆرکمنیستانینگ غاراشسیز دؤولت حؤکمۆنده ایقرار ادیله نی نینگ بیر ییللیق بایرامینی اولی دابارا بیلِن بِللاپ گچدی. بیزینگ یوردومیزینگ غاراشسیز دؤولته اؤورۆلمگی نینگ تاریخی، اقتصادی، سیاسی، مدنی و روحی اهمیِتی أگیرت اولودیر، مونگا دولی صوراتدا چونگنگور دۆشۆنمک اۆچین واغت گرک، غازانیلان دؤولت غاراشسیزلیغی نینگ غادیرینا حاص هم چونگنگور دۆشۆنیـلر یالی، اونگا اؤز سؤزۆمی آیتماق نییِتی بیلن من شو ماقالا بیلِن چیقیش اتمگی ماقول بیلدیم

ساغدان: بالیش عوض اوف- خوشچف

ن، س، خروشچوف س س ک پ م ک- نینگ پرِزیدیومی نینگ باشلیغی وظیفه سینده ۱۹۶۲- نجی ییلینگ سِنتیابریندا تـۆرکمنیستانا گلدی. اول واغت بالیش عؤوضوف ت ک پ م ک- نینگ بیرینجی سِکرِتاریدی و سویوزینگ اینگ بِلند مِرتِبِلی یولباشچیسی نینگ یانیندا بیله بولیاردی. اولار ۱۹۶۲- نجی ییلینگ ۳۰- نجی سِنتیابریندا تـۆرکمنیستان علیملار آکادِمییاسینا گلدیلِر. بیزی، یاغنی دینگه علیملار آکادِمییاسی نینگ آغضالارینی حأضیرکی گئولوگییا اینستیتوتی نینگ زالینا یئغنادیلار، سِبابی اول واغت دینگه شو اینستیتوتینگ جایی سالنیپدی، تـۆرکمنیستان علیملار آکادِمییاسی نینگ شول واغتقی پرِزیدِنتی شاجا باتیروف دوشوشیغی آچیپ، حورماتلی میخمانا خوشامای سؤزلِری آیتدی، آکادِمییا بارادا غیسغاچا حابار بِردی. اول ۱۹۴۸- نجی ییلینگ آغیر غینانچلی یِر تیترِمِسیندِن سونگرا۱۰ ییلدان غووراق واغت گچِن هم بولسا، انتِک علیملار آکادِمییاسی نینگ اساسی علمی- بارلاغ اینستیتوتلاری نینگ جایلاری نینگ سالنیپ باشلانماندیغینی آیتدی.

سونگرا ش، باتیروف شیله رأک أهِنگده گۆرلدی

شاجا باتیروف

— غورلوشیق بیزینگ اۆچین اساسی چؤزۆلمِلی مسئله لرینگ بیریدیر، علیملار آکادِمییاسی دؤرالی بأری انتِک۱۰ ییل هم گچِه نوق، علمی ایشگأرلِرینگ سانی اؤران آز، اولاری اوزالی بیلِن مرکزی علمی- بارلاغ اینستیتوتلاری نینگ دوکتورانتوراسیندا و آسپیرانتوراسیندا تاییارلامالی، علمی ایشگأرلری تاییارلاماق و اولارینگ اشتاتینی کؤپِلتمِک تـۆرکمنیستانینگ علمینی اؤسدۆرمِگینگ اساسی مسئله سی بولوپ دوریار، بو واجیپ مسئله لرینگ چؤزۆلمِگینده بیز بِِلند مِرتِبِلی میخمانینگ کؤمِگینه مأتأچدیریس — اول ن، س، خروشچووا یۆزلِنیپ: — "سیزینگ تـۆرکمنیستانینگ علیملار آکادِمییاسینا گلمِگینگیز بو مسئله لرینگ چؤزۆلمِگینه اولی یاردام اتجِکدیگینه اینانیاریس، اؤزۆمیز بولسا سیزینگ، بیزه غـویان حورماتینگیزی و اینامینگیزی اؤدأریس" دییدی.

ش، باتیروف سؤزۆنی غـوتاران دِسسینه، ن، س، خروشچوف آصیل هیچ کیمی گپلِتمأن، سِن- ده یوق، من- ده دییلیشی یالی، یِریندِن تارسا توردی- دا گؤس- گؤنی جۆبۆلرینی چؤوۆریپ: "اینحا گؤریأنگیزمی، اولارینگ ایچی بوش" دییدی.

بِلند مِرتِبِلی، دۆنیأده اینگ بِییک یِنگیلمِز دیییلیأن دؤولتینگ اینگ بِلند یولباشچی سینینگ بو بولشی بیزی گنگ غالدیردی. اۆستـۆمیزدِن غاینان سوو غویلان یالی بولدوق.

شول گۆنۆنگ اؤیلأنی تـۆرکمنیستانینگ یوقاری سووتی نینگ دِپوتاتلارینا ت ک پ م ک- نینگ آغضالارینا آشغابادینگ "قولخوزچی" استادیونیندا ن. س. خروشچووینگ گلمِگینه باغیشلانیپ گچیریلجک میتینگه بارمالی دییدیلِر. بیز اونونگ اۆچین غورالان تریبونانینگ ساغ طاراپیندا اوتوردیق. اؤنگۆندِن تاییارلانیلان سِناریی بویونچا، یاشلارینگ- ایشچیلِرینگ، قولخوزچیلارینگ آدیندان۳ آدام چیقیش اتدی. شول زامانانینگ دأبی بویونچا اؤزلِری نینگ چیقیشیندا اؤنگۆندِن ماصلاحاتلاشیلان حایسی- دا بولسا بیر مسئله بویونچا اولار بِلند مرتِبِلی میخماندان کؤمِک سورادیلار. سونگرا ن. س. خروشچوف میکروفونینگ یانینا گلدی. اول اؤز چیقیشیندا شیله دییدی: "اینحا، سیز حورمات غویوپ، مندِن دیلِگ ادیأرسینگیز،امما سیز ایندی کیچیجیک چاغاجیق دأل، سیز ایندی یِتیشیـپسینگیز، دیش یاریپسینگیز،اگر سیزه گؤوسۆنگی توتدورسانگ، سیز اونی اممأن، دیشلأپ غوپارارسینگیز آخیرین، ایندی سیز اؤزۆنگیز اکلِنجک بولونگ" دییدی.

میتینگده اوتوران آداملارینگ حۆنگۆردیسینه یِر غوزغانان یالی بولدی، یانیمدا بیله ایشلِشیپ یؤرِن دِنگ-دوشلاریم "اگر بیزینگ ۳ طبیغی بایلیغیمیزینگ دینگه بیری اؤز ایغتییاریمیزا بِریلسه، گۆنۆمیزی گؤرِردیک" دییدیلِر

"تـۆرکمنیستان" غازیتی 92/ 13 - نویابر

ماقالانی روس حاطیندان عاراپ- پارس الیب- بیی سینه گچیریپ، اونی غایتادان ییغان هم صوراتلار بیلن بزأن:

آقمیرات گۆرگنلی