کانون و ایل گویجی حاقیندا-غوشغولار

ILGÜÝJI MEN

Arzuwlardan döredim,
Il derdine ýaradym,
Güne tarap ýöredim,
                          Nur paýlan sawçy men
                          Tanyşyňyz Ilgüyji men.

Söz dürlerin saýlaýan,
Gapy-gapy aýlanýan,
Il-günüme paylayan,
                           Dür paýlaýan sawçy men,
                          Tanşyňyz Ilgüýji men.

Dagy-deräni geçýän
Azatlyga ýol açýan,
Döwlere köpün biçýän
                             Döw awlaýan awçy men,
                            Çünki iliň güýji men.

Süýtden süýji mende bar,
Ötden ajy mende bar,
Halkym maňa hyrydar,
                             Halk duşmanna ajy men,
                             Çünki iliň güýji men.

Ertejadan uruldym, (ارتجاع دان)
Ençe çäre görüldüm,
Emma ýene öwrüldim,
                              Deňizleriň möwji men,
                              Çünki iliň güýji men.

Egsilmeýän güýjüm bar,
Her derde alajym bar,
Zalymlarda öjüm bar,
                             Janlaryna iýji men,
                             Çünki iliň güýji men.

Dessanlardan söz açýan,
Hüwdi, läle dür saçýan,
Bulut dek ýagyp geçýän
                               Dür paýlaýan sawçy men,
                               Tanşyňyz İlgüýji men.

Yürekleriň sazy men,
Bagşylaň owazy men,
Buşlaýaryn ýazy men,
                              Ýaz buşlaýan sawçy men,
                              Tanşyňyz İlgüýji men.

Şahyrlaň diwany men,
Durşum bilen many men,
Aýlanýan dünýäni men,
                                 Dostluk açýan sawçy men,
                                 Tanşyňyz Ilgüýji men.

Işçi bilen işleýän,
Daýhanlarda düşleýän,
Zähmeti alkyşlayan,
                              Zähmetkeşi söýüji men
                               Şondan alýan güýji men.

Daňatar. Daşahowuz. 1985 ý.

(Ildeşimiz Daňatar 1358-de Kümmetgowuzda KANUNYŇ ýygnagynda Ilgüýji adyny teklip edipdi we şol teklip kabul edilip, şondan bäri Medeni we Syýasy Ojagyň neşir organynyň resmi ady hökmünde alnyp gelinýär.)
                                                                        **********

OJAGYM

Saňa ojagym diýýän,

Saňa döneýin

Şu günüm

saňa,

geljegim diýýän,

saňa ojagym diýýän.

Ojak ak öýleriň keramatydyr,

Diriligiň alamatydyr ojak.

Aýazdan awunyp seni gözledik,

Ümürden eýmenip seni gözledik.

Sen giýjeki gözelliklerden döränsiň

Umytdan, sen uçgunlardan döränsiň.

Gurşun sende ereýär,

Polat sende taplanýar.

Öýüm, obam, bütin ilim,

Nur alýar senden.

Howruňda enäniň mähri bar, ýyly,

Şöhläňde atanyň gujyry, ýaşyl,

Göwräňde asryň pähmi, gyzyl

(Nuryňde ümzük atyp öňe barýas.)

Türkmen sensiz sesini äleme ýaýmaz,

Türkmeniň bagytnamasyn sen ýazdyň,

Özge ýazmaz.

Sen türkmeniň doly arzuw gözleri

Sen türkmeniň aýdan, aýtjak sözleri.

Dokguz ýyl,

Bir seretseň azajyk ömür

Ýöne görseň näçe menzil geçilen,

Dokguz ýylda,

Onlarça syr açylan.

Ykbaldan nalamak bize ýatdyr, ýat

Bu durmuşdyr, aslynda şeýleräkdir

Oýunlary bardyr her rakam, her tüýs

Görülmedik zatlar däl,

Zyndan,

Sürgün,

Töhmet,

Ýas...

Ýöne hiç zat böwet bolmaz umyda,

Umyt atasydyr bar ýeňişleriň,

Daşyňda pyrlanýan bu perwanalar

Gorapdy, ýene-de gorar namysy.

Hakykat ýeňdi, ýene-de ýeňer,

Ojagym ýakypdy ömür tümligi

Ýene-de ýakar,

Gudratyňa ynanýan,

Ojagym diýýän saňa!

Annamuhammet Sada (Sanjar)

Azer aýy. 1366